ಒಂದು ಸಾರಿ ಹೇಳಿಬಿಡು

ಅದೇಕೆ ಮಾಡಿದೇ ಚೆಲುವೇ ನೀ ನನ್ನ ಹೃದಯದ ಲೂಟಿ,

ನನ್ನಲ್ಲೀಗ ಮೂಡಿದೆ ಹೇಳಿಕೊಳ್ಳಲಾಗದ ಬಯಕೆಗಳು ಕೋಟಿ.

ಅನಿಸುತ್ತಿದೆ ಯಾಕೋ ಈ ಬದುಕೇ ಅಪೂರ್ಣ ನಿನ್ನ ವಿನಹ,

ಸಿಗುತ್ತಿಲ್ಲ ನನಗೇ ಯಾವುದೇ ಕಾರಣ ಬರಲು ನಿನ್ನ ಸನಿಹ.

ಆಕಾಶವನ್ನೇ ಮುಟ್ಟುವ ಭರವಸೆಯೇನೋ ಇದೆ ನನಗೆ,

ಆದರೆ ಧೈರ್ಯವೇ ಸಾಲುತ್ತಿಲ್ಲ ಹೇಳಲು ನನ್ನಾಸೆ ನಿನಗೆ.

ಬಾ ನನ್ನ ಒಲವೇ ಈ  ಕಣ್ಣಲ್ಲೊಮ್ಮೆ ಕಣ್ಣಿಟ್ಟು ನೋಡು,

ನೀ ನನ್ನವಳೆಂದು ನನಗೊಂದೇ ಒಂದು ಸಾರಿ ಹೇಳಿಬಿಡು.

- ಹರ್ಷ ಹೆಮ್ಮಾಡಿ.

ಮನದ ಮಾತು

ಕೇಳಿಸುತ್ತಿಲ್ಲವೇನೇ ಹುಡುಗಿ ನನ್ನ ಮನದ ಮಾತು,

ಕೇಳಿಸಿದರೆ ಈಗಲೇ ಓಡಿ ಬಾ ಮಾತಾಡೋಣ ಕೂತು.

ಮೊದಮೊದಲು ನೀ ನನ್ನ ಕನಸಲ್ಲಿ ಮಾತ್ರ ಬರುತ್ತಿದ್ದೆ,

ಈಗ ಆ ಕನಸು ನನಸಾಗಿ ನೀ ಕದ್ದೇ ನನ್ನ ನಿದ್ದೆ.

ಮೊನ್ನೆ ನಿನ್ನೆವರೆಗೂ ನಾವಿಬ್ಬರೂ ಅಪರಿಚಿತರು,

ನಿನ್ನಿಂದು ಕಂಡು ನನ್ನೆದೆಯಲ್ಲಿ ನಿನ್ನದೇ ಕಾರುಬಾರು.

ನನಗ್ಯಾಕೋ ಅನಿಸುತ್ತಿದೆ ನೀನೇ ನನ್ನ ಮನದೊಡತಿ,

ನಿನಗೂ ಅನಿಸಿದರೆ ಹೇಳಿಬಿಡು ನನಗೆ ಒಂದು ಸರತಿ.

- ಹರ್ಷ ಹೆಮ್ಮಾಡಿ.

ಹರ್ಷ ಉವಾಚ-೧೧

ನಮಗೆಲ್ಲಾ ತಿಳಿದಿರುವುದು ೦.೧% ಮಾತ್ರ, ತಿಳಿಯದೇ ಇರುವುದು ೯೯.೯%. ಅಚ್ಚರಿಯೆನಿಸಿದರೂ ಇದು ನಿಜ.

- ಹರ್ಷ ಹೆಮ್ಮಾಡಿ.

ಮನದರಸಿ

ನಮ್ಮ ಸಂಬಂಧ ಮುರಿದುಕೊಂಡು ಎರೆಡು ವರ್ಷ ಕಳೆದರೂ,

ನೀ ಕರೆಮಾಡಿದಾಗಲೆಲ್ಲಾ ಒದ್ದೆಯಾಗುತ್ತೆ ಕಣ್ಣು, ಬಿಗಿಗೊಳ್ಳುತ್ತೇ ಉಸಿರು.

ಯಾವ ಚೆಲುವೆಯರ ಕಣ್ಣಲ್ಲೂ ನಿನ್ನ ಕಣ್ಣಲ್ಲಿರೋ ಸೆಳೆತವಿಲ್ಲ,

ನಿನ್ನ ಹೊರತು ಇನ್ಯಾರೂ ಕೂಡ ಇಂದಿಗೂ ನನ್ನ ಮನ ಸೆಳೆಯಲಿಲ್ಲ.

ವಾಸ್ತವತೆ ಇರಲಿ ಕನಸಿನಲ್ಲೂ ನೀನೇ ನನ್ನ ಕಣ್ಣೆದುರು ಬರುವೆ,

ಅಂದು ಇಂದು ಎಂದೆಂದಿಗೂ ಗೆಳತಿ ನೀನೇ ನನ್ನ ಮನಸಿನಲ್ಲಿರುವೆ.

ಅರ್ಥವಾಗುತ್ತಿಲ್ಲ ಯಾಕೆ ನನಗೆ ಈ ಶಿಕ್ಷೆ ನನ್ನ ಮನದರಸಿ,

ಬಳಲಿ ಬೆಂಡಾಗಿರುವೆನು ದಿನವೂ ನಾ ನಿನ್ನ ಸೇರಲು ಹವಣಿಸಿ.

- ಹರ್ಷ ಹೆಮ್ಮಾಡಿ.

ಬಯಕೆ

ನೀ ಸನಿಹವಿದ್ದಾಗ ಬಾಯಿಬಿಡದೇ ನಾ ಮೂಕಾದೆ,

ನನ್ನ ಮನದ ಮಾತು ತಿಳಿಯದೇ ನೀ ದೂರಾದೆ.

ಖಾಲಿ ಮನಸ್ಸಲ್ಲಿ ನೀ ಬರೆದೇ ಬಣ್ಣ ಬಣ್ಣದ ಚಿತ್ತಾರ,

ಬಣ್ಣಗಳು ಮಾಸುವ ಮುಂಚೆ ಓಡಿ ಬಾ ನಲ್ಲೆ ಹತ್ತಿರ.

ಸಸಿ ಮನಸ್ಸು ಬೆಳೆದಿದೆ ಇಂದು ಮರದಷ್ಟು ಎತ್ತರ,

ನನ್ನ ಎದುರಿರುವ ಪ್ರಶ್ನೆಗಳಿಗೆಲ್ಲಾ ನೀನೇ ಉತ್ತರ.

ತುಂಬಾ ಮಾತನಾಡುವ ಬಯಕೆ ಮೂಡಿದೆ ಇಂದು,

ಈಗನಿಸುತ್ತಿದೆ ನಾನಂದು ತಪ್ಪು ಮಾಡಿದೆಯೆಂದು.

- ಹರ್ಷ ಹೆಮ್ಮಾಡಿ.

ಪ್ರೀತಿಗೆ ಕಣ್ಣಿಲ್ಲ

ಪ್ರೀತಿಗೆ ಕಣ್ಣಿಲ್ಲ ಅನ್ನೋದು ಒಪ್ಪಬಹುದು,

ಆದರೆ ಬಾಯಿದೆ ಕಣ್ರೀ ಬಯ್ಯಬಹುದು.

ಮೊದಮೊದಲು ಕರೀತಾರೆ ಚಿನ್ನ ರನ್ನ,

ದಿನ ಕಳೆದಂತೆ ಅಲ್ಲಿ ಬರೀ ಥೂ ನಿನ್ನ.

ಪ್ರೀತೀಲಿ ನಂಬಿಕೆ ಸದಾ ಇರಬೇಕು,

ಸಂದೇಹ ಮೂಡಿದರೆ ಉಚಿತ ಬಿರುಕು.

ಪ್ರೀತಿಸಲು ಬೇಕು ಸಮಯ ಸಂಯಮ,

ನನಗಂತೂ ಆಗಿಬರೋಲ್ಲ ಈ ನಿಯಮ.

- ಹರ್ಷ ಹೆಮ್ಮಾಡಿ.

ಕನ್ನಡಿ

ಯಾರಿಟ್ಟರೋ ಅವಳು ಕಾಣಿಸುವಂತೆ ಆ ಕನ್ನಡಿ,

ನಿರಾಳನಾಗುತ್ತಿದ್ದೆ ನಾನವಳ ಪ್ರತಿಬಿಂಬ ನೋಡಿ.

ಇಲ್ಲದಾಗಲೆಲ್ಲ ಆ ಜಾಗದಲ್ಲಿ ಅವಳ ವಾಸ್ತವತೆ,

ನನಗೆ ಏನೋ ಒಂದು ಕಡಿಮೆಯೆಂಬ ಭಾವುಕತೆ.

ಬೇಜಾರು ನೋಡಲು ಅವಳ ಬಿಂಬವಿಲ್ಲದ ದರ್ಪಣ,

ಜನರಿಲ್ಲದ ಖಾಲಿ ಬೀದಿ ಅನಿಸುವಂತೆ ಬಣ ಬಣ. 

ಕನ್ನಡಿ ಯಾಕೆ ನೀ ಅಂದು ಅವಳನ್ನು ಕಾಣಿಸಿದೆ,

ಇಂದು ನಾ ಚಡಪಡಿಸುತ್ತಿರುವೆ ಅವಳು ಕಾಣಿಸದೆ.

- ಹರ್ಷ ಹೆಮ್ಮಾಡಿ.

ಹರ್ಷ ಉವಾಚ-೧೦

“ನಿರೀಕ್ಷೆಯಿಲ್ಲದ ಸಂಬಂಧವಿಲ್ಲ.”

- ಹರ್ಷ ಹೆಮ್ಮಾಡಿ.

ಮೂಲಭೂತ ಸೌಕರ್ಯ

ದಿನನಿತ್ಯ ಸತ್ತು ಬದುಕಿ ಅಳುತ್ತಿರುವವರಿವರು,

ಸತ್ತಂತೆ ಬದುಕಿ ನಮ್ಮನ್ನು ಆಳುತ್ತಿರುವವರವರು.

ಬಸ್ ನಿಲ್ದಾಣ,ರಸ್ತೆ ಬದಿಯೇ ಇವರಿಗೆ ಮಹಲು,

ಕೇಳಿಸಿದರೂ ಕೇಳದಂತಿದ್ದಾರೆ ಆಳುವವರಿವರಳಲು.

ಬಹುಶಃ ಇಂಥವರು ಸರ್ಕಾರದ ಗಣತಿಗೂ ಸಿಗರು,

ಯಾಕೆಂದರೆ ಇವರು ಯಾವ ಗುರುತುಪತ್ರ ಹೊಂದಿರರು.

ಯಾವ ಸರ್ಕಾರ ಏನೇನೋ ಸಾಧಿಸಿದರೇನು ಪ್ರಯೋಜನ,

ಮೂಲಭೂತ ಸೌಕರ್ಯವನ್ನೇ ಪಡೆಯದಮೇಲೆ ಎಲ್ಲಾ ಜನ. 

- ಹರ್ಷ ಹೆಮ್ಮಾಡಿ.

ಜನನ - ಮರಣ

ಯಾಕಾಯ್ತೋ ಗೊತ್ತಿಲ್ಲ ಇಲ್ಲಿ ನಮ್ಮಲ್ಲೆರ ಜನನ,

ಆದರೆ ಏನಾದ್ರೂ ಮಾಡ್ಬೇಕು ಆಗೋದ್ರೊಳಗೆ ಮರಣ.

ಹುಟ್ಟಿನಿಂದ ಸಾಯೋವರೆಗೂ ಸ್ವಾರ್ಥ ಬಿಡಲ್ಲ ಈ ಜನ,

ಎಷ್ಟೆಷ್ಟೋ ಕೂಡಿಡ್ತೀವಿ ಅದರಿಂದಾಗ್ಬೇಕು ಪ್ರಯೋಜನ.

ಹೋದಮೇಲೂ ಉಸಿರು ಹಸಿರಾಗಿರಬೇಕಾದರೆ ಹೆಸರು,

ದಾನಿಯಾಗು ತುಂಬಬಹುದು ಅದೆಷ್ಟೋ ಹಸಿದ ಬಸಿರು.

ಹುಟ್ಟು ಇಲ್ಲಿಗೆ ಉಪಯೋಗವಾದರೆ ಅದಕ್ಕೊಂದು ಅರ್ಥ,

ಹಾಗೇ ಹುಟ್ಟಿ ಹೀಗೇ ಸತ್ತರೇ ಅದು ಕೇವಲ ವ್ಯರ್ಥ.

- ಹರ್ಷ ಹೆಮ್ಮಾಡಿ.

ಯಾರೇ ನೀನು

ಯಾರೇ ನೀನು ನನ್ನ ಕನಸಿನಲ್ಲಿ ಬರುವ ಕನ್ಯೆ,

ನನಸಿನಲ್ಲೂ ನೋಡುವಾಸೆ ಆ ನಿನ್ನ ಕಣ್ಸನ್ನೆ.

ಯಾರೇ ನೀನು ನನ್ನ ಮನೆ ಮನದೊಡತಿ,

ಕಣ್ಣುಮುಚ್ಚಲೂ ಬಿಡದೇ ಯಾಕಿಂಗೆ ಕಾಡುತಿ.

ಯಾರೇ ನೀನು ನನ್ನ ಮನಸೆಳೆದ ಅಭಿಸಾರಿಕಾ,

ಅಮಾವಾಸ್ಯೆ ರಾತ್ರಿಯಲ್ಲೂ ಕಂಡ ನಿಹಾರಿಕಾ.

ಯಾರೇ ನೀನು ನನ್ನ ಅರಸಿ ಬಾ ನನ್ನ ಬಳಿಗೆ,

ಎಂದು ಬರುವುದೋ ನಿನ್ನ ನೋಡುವ ಘಳಿಗೆ.

- ಹರ್ಷ ಹೆಮ್ಮಾಡಿ.

ಪಂಚೇಂದ್ರಿಯ

ಕುರುಡು ನಾನು ಅಂದುಕೊಂಡಿದ್ದೆ ನೀ ನನ್ನ ಕಣ್ಣು,

ಕೊರಡು ನೀನು ತಿನ್ನಿಸಿದೆಯಲ್ಲೇ ನನಗೆ ಮಣ್ಣು.

ಕಣ್ಣಿರಲಿ ನಾಸಿಕವೂ ಗ್ರಹಿಸಲಿಲ್ಲ ನಿನ್ನ ಕಪಟದ ಗಂಧ,

ಚುಂಬಿಸಿದಾಗಲೂ ರುಚಿಸಲಿಲ್ಲ ನಾಲಿಗೆಯ ಸುಳ್ಳಿನ ಬಂಧ.

ನಿನ್ನ ಸುಳ್ಳುನುಡಿಗಳನ್ನು ಸೂಳ್ನುಡಿಗಳಂತೆ ಭಾವಿಸಿತ್ತಂದು ನನ್ನ ಕಿವಿ,

ಅಂದು ಸುಳ್ಳೆಂದು ಗೊತ್ತಿದ್ದಿದ್ದರೆ ಇಂದು ನಾನಾಗುತ್ತಿರಲಿಲ್ಲವೇನೋ ಕವಿ.

ಅಂದು ನನಗೆ ತುಂಬಾ ಮೃದುವಾಗಿತ್ತು ನಿನ್ನ ಒರಟು ಸ್ಪರ್ಷ,

ಪಂಚೇಂದ್ರಿಯಗಳೇ ನಿಷ್ಕ್ರಿಯೆಗೊಂಡು ಮೋಸಹೋದ ಈ ಹರ್ಷ.

- ಹರ್ಷ ಹೆಮ್ಮಾಡಿ.

ಸಂಜೆ

ನಿನ್ನ ನೆನಪಿಸಲು ಮತ್ತೆ ಮತ್ತೆ ಯಾಕೆ ಬರುತ್ತೆ ಈ ಸಂಜೆ,

ಗೆಳತಿ ನೀನಿಲ್ಲದ ಸಂಜೆ ಕಳೆಯುವುದೇ ನನಗೊಂದು ಸಜೆ.

ಹಗಲಲ್ಲಿ ಹಿಡಿದಿಟ್ಟಿರುವ ಆಸೆಗಳು ಸಿಗದ್ಯಾಕೆ ಸಂಜೆ ಹತೋಟಿಗೆ,

ಕೊಡಬಹುದೇ ಪರಿಹಾರ ನಲ್ಲೆ ನೀ ನನ್ನ ಈ ಪಚೀತಿಗೆ.

ಅಪರೂಪಕ್ಕೆ ಮರುಭೂಮಿಯಲ್ಲಿ ಕಾಣುವ ಮರೀಚಿಕೆ ಹಾಗೆ,

ನೀ ಬಂದುಹೋದ ಈ ಬಾಳಲ್ಲಿ ಈಗ ಬರೀ ವಿರಹದ ಬೇಗೆ.

ಗೊತ್ತಿಲ್ಲ ನನಗೆ ಹೀಗ್ಯಾಕೆಂದು ನಿನ್ನ ನೆನಪು ಬಂದರೆ ಸಾಕು,

ಕನಸಲ್ಲಾದರೂ ಒಮ್ಮೆ ಬಂದು ಈ ನೋವುಗಳ ದೂರನೂಕು.

- ಹರ್ಷ ಹೆಮ್ಮಾಡಿ.

ಬಳ್ಳಿ

ಬಳ್ಳಿಯೇ ಓ ಬಳುಕೋ ಬಳ್ಳಿಯೇ,

ನನ್ನ ಮನಸ್ಸು ಕದ್ದ ಕಳ್ಳಿಯೇ.

ಆಹಾ ಬಳ್ಳಿಯಂತ ನಿನ್ನ ಮೈಮಾಟ,

ಇನ್ನು ಕದಲೋದುಂಟೆ ನನ್ನ ಕಣ್ಣೋಟ.

ನಿಜ ಕೇಳೇ ನನ್ನ ಬಂಗಾರ,

ನಿನ್ನ  ನಗುವೇ ನಿಂಗೆ ಸಿಂಗಾರ.

ನೀನೇ ನನ್ನ ಮುದ್ದು ಭಾಮ,

ಕಾಯ್ತಿದ್ದಾನೆ ಈ ನಿನ್ನ ಶ್ಯಾಮ.

- ಹರ್ಷ ಹೆಮ್ಮಾಡಿ.

ಅನಾಮಿಕಾ

ಅನಾಮಿಕಾ ನಿನ್ನಲ್ಲೇನೋ ಇದೆ,

ನಿನ್ನ ಕಣ್ಣು ನನ್ನೇ ಕಾಡುತ್ತಿದೆ.

ಒಮ್ಮೇ ಬಾರೆ ನನ್ನ ಎದುರು,

ನೀನೇ ಕಣೆ ನನ್ನ ಉಸಿರು.

ಈ ಥರ ಯಾವತ್ತೂ ಆಗಿಲ್ಲ,

ನನ್ನ ಕಾಲು ನೆಲದ್ಮೇಲೆ ನಿಲ್ತಿಲ್ಲ.

ನನ್ನ ಹೃದಯ ಇನ್ನೂ ಖಾಲಿ ನೋಡೆ,

ನೀ ಬಂದು ಆ ಜಾಗ ತುಂಬಿ ಬಿಡೆ.

- ಹರ್ಷ ಹೆಮ್ಮಾಡಿ.

ಹಣೆಬರಹ

ಇದ್ದರೇನು ತಲೆಮಾರಿಗಾಗುವಷ್ಟು ಶ್ರೀಮಂತಿಕೆ,

ನಿನಗೆ ಇರದಿದ್ದ ಮೇಲೆ ಸ್ವಲ್ಪವೂ ಸ್ವಂತಿಕೆ.

ಆಗುವುದಿಲ್ಲಿ ಪ್ರತಿಹುಟ್ಟು ಏನಾದರೂ ಸಾಧಿಸಲೆಂದು,

ಎಷ್ಟು ಸರಿ ಏನನ್ನೂ ಸಾಧಿಸದೆ ಸಾಯುವುದು.

ಒಳ್ಳೆಯವನಿಗೆ ಗತಿಸಿದಮೇಲೂ ಸಿಗುವುದು ಆರಾಧನೆ,

ಕೆಟ್ಟವನಾದರೆ ಮಾಡರೂ ಕೂಡ ಸಮಾರಾಧನೆ.

ಕೂಗಾಡು ಬಡಿದಾಡು ಮಾಡಿದ್ದೇ ಮಾಡು ಪುನಹ,

ಕೊನೆಗಾಗುವುದು ಏನಿದೆಯೋ ನಿನ್ನ ಹಣೆಬರಹ.

- ಹರ್ಷ ಹೆಮ್ಮಾಡಿ.

ಅರ್ಧಾಂಗಿ

ಒಳ್ಳೆಯವಳು ನನ್ನ ಅರ್ಧಾಂಗಿ,

ನಾನೇ ಸ್ವಲ್ಪ ಎಡಬಿಡಂಗಿ.

ನಮ್ಮಿಬ್ಬರ ಪ್ರೀತಿ ಅದು ಅಸಲಿ,

ಆಗುವುದೂ ಜಗಳ ಕೇವಲ ನಕಲಿ.

ನನ್ನ ಉಸಿರು ಕಣೇ ನೀನು,

ನೀನಿಲ್ಲದೆ ಬದುಕಲ್ಲ ನಾನು.

ನೀನಾಗಬೇಕು ನನ್ನ ಬಾಳಿಗೆ ಒಡತಿ,

ನಾ ಜನ್ಮವೆತ್ತಿದರೂ ಎಷ್ಟೇ ಸರತಿ.

- ಹರ್ಷ ಹೆಮ್ಮಾಡಿ.

ಉಪ್ಪು

ಯಾಕೆ ನಮಗಿಲ್ಲಿ ಹುಟ್ಟುವುದು ಉಪ್ಪು ಖಾರದ ಕನಸು,

ಬಾಳು ಮತ್ಯಾಕಿಷ್ಟೊಂದು ಸಪ್ಪೆ ಅದಾಗದಿದ್ದಾಗ ನನಸು.

ಈ ಬಾಳೆಂಬ ಅಡುಗೆಯನ್ನು ನಾವು ಮಾಡ್ತಿರೋದೇ ತಪ್ಪೇ,

ಎಷ್ಟು ಜಾಗ್ರತೆವಹಿಸಿದರೂ ಎಲ್ಲೋ ಒಂದ್ಕಡೆ ಉಪ್ಪುಸಪ್ಪೆ.

ಯಾವ ಒಗ್ಗರಣೆ ಹಾಕಿ ಎಷ್ಟು ಘಮಘಮಿಸಿದರೇನು,

ಉಪ್ಪೇ ಸರಿಯಿಲ್ಲವೆಂದಮೇಲೆ ಆ ಅಡುಗೆಗರ್ಥವೇನು.

ಯಾರಿಗೆ ಬೇಕು ಉಪ್ಪೇ ಇಲ್ಲದ ಮ್ರಷ್ಟಾನ್ನ,

ಸಾಕಲ್ಲವೇ ಉಪ್ಪು ಖಾರ ಸರಿಯಿರುವ ಚಿತ್ರಾನ್ನ.

- ಹರ್ಷ ಹೆಮ್ಮಾಡಿ.

ಪ್ರೀತ್ಸೋದು ತಪ್ಪಾ?

ಕುಂತಲ್ಲೂ ನಿಂತಲ್ಲೂ ನಿನ್ನದೇ ಕನವರಿಕೆ,

ಬೆಚ್ಚಿಬೀಳುತ್ತೇನೆ ಆದಾಗ ನೀನಿಲ್ಲವೆಂಬ ಮನವರಿಕೆ.

ಅಂದೆಲ್ಲಾ ನಿನ್ನ ಹೊಗಳಿಕೆಯಿಂದ ನಾನಾಗಿದ್ದೆ ಪ್ರಭಾವಿತ,

ಇಂದು ನೀನೇ ಇಲ್ಲ ಯಾಕಾಯ್ತು ಈ ಅನಾಹುತ.

ಸಾಕಾಗಿದೆ ಸತ್ತ ಸಂಖ್ಯೆಗೆ ರಿಂಗಣಿಸಿ,

ಎಲ್ಲಿ ಮರೆಯಾದೆ ನೀ ಪ್ರೀತಿ ಕಡೆಗಣಿಸಿ.

ಪ್ರೀತ್ಸೋದು ತಪ್ಪಾ ಇಲ್ಲಿ ಬರೀ ನೋವೇನಾ,

ಇಲ್ಲಾ ಕಳೆದುಕೊಂಡಿದ್ದು ನಿನ್ನ ಅರ್ಥೈಸಿಕೊಳ್ಳದೇನಾ.

- ಹರ್ಷ ಹೆಮ್ಮಾಡಿ.

ಸುಮ

ನಿನ್ನ ಘಮದಿಂದ ನನ್ನ ಗಮನ ಸೆಳೆದ ಸುಮ,

ನೀನಿಂದಿಲ್ಲ ಎಲ್ಲಿ ಹುಡುಕಲಿ ನಿನಗೆ ಸರಿಸಮ.

ನನ್ನೆದೆಯಲ್ಲಿ ಅರಳಿದಷ್ಟೇ ಬೇಗ ನೀ ಒಣಗಿ ಹೋದೆ.

ಆದರೂ ಆ ಘಮ ನನ್ನ ಮನಸ್ಸಿನಲ್ಲಿ ಹಾಗೇ ಉಳಿದಿದೆ,

ಕೆಲವೊಮ್ಮೆ ಆ ಘಮ ಮನಸ್ಸಿಗೆ ಹಿತ ತಂದರೆ.

ಇನ್ನೂ ಕೆಲವೊಮ್ಮೆ ತಲೆನೋಯುವುದು ನನಗದು ತೊಂದರೆ.

ಸುಮ ನೀನಿಲ್ಲದ ಮೇಲೆ ಈ ಘಮ ನನಗ್ಯಾಕೆ.

ನೆನಪಿನಿಂದ ಹೊರಹೋಗಿ ಬಿಡು ನೆಮ್ಮದಿಯಿಂದ ಬದುಕೋಕೆ,

- ಹರ್ಷ ಹೆಮ್ಮಾಡಿ.

ಒಂದ್ಸಲ ಮಾತಾಡಿ

ಒಂದ್ಸಲ ಮಾತಾಡಿ ತುಂಬಾ ಬೇಜಾರಾಗ್ತಿದೆ,

ಬಾಯ್ತುಂಬಾ ಬಯ್ದ್ಬಿಡಿ ನೋವು ಕಡಿಮೆ ಆಗ್ತದೆ.

ನಿಮ್ಮನ್ನ ತಬ್ಕೊಂಡು ಅಳಬೇಕು ಅನಿಸ್ತಿದೆ,

ಕಣ್ಣು ಮುಚ್ಚಿದ್ರೆ ನಿಮ್ಮ ಮುಖವೇ ಕಾಣಿಸ್ತಿದೆ.

ನಿಮ್ಮನೆ ಎದುರ್ಗಡೆ ಪಂಚರ್ ಆಗ್ಲಿ ನನ್ನ ಗಾಡಿ,

ಬಾಲ್ಕನಿಗೆ ಬನ್ನಿ ಖುಷಿಪಡ್ತೀನಿ ನಿಮ್ಮ ನೋಡಿ.

ಗಂಟಲು ನೋವಾಗ್ತಾ ಇದೆ ಹಾಡಿದ್ದೇ ಹಾಡಿ,

ಏನಾದ್ರೂ ಅಂದ್ಕೊಳ್ಳಿ ಒಂದ್ಸಲ ಮಾತಾಡಿ.

- ಹರ್ಷ ಹೆಮ್ಮಾಡಿ.

ನಾನು ನೀನು

ಒಮ್ಮೆ ಎದುರುಗೊಳ್ಳುವಾಸೆ ನಿನ್ನ ನಾನು,

ಬಿಡುವುಮಾಡಿಕೊಂಡು ಸಿಗುತ್ತೀಯಾ ನೀನು.

ಕಣ್ತುಂಬಾ ತುಂಬಿಕೊಳ್ಳಬೇಕು ನಿನ್ನ ನಾನು,

ನನಗೋಸ್ಕರ ಮನದುಂಬಿ ನಗುತ್ತೀಯಾ ನೀನು.

ಕಿವಿಗೊಟ್ಟು ಕೇಳಬೇಕು ನಿನ್ನ ನಾನು,

ನನ್ನ ಹೆಸರನ್ನು ಬಾಯ್ತುಂಬಾ ಕರೆಯುತ್ತೀಯಾ ನೀನು.

ಬಿಗಿದಪ್ಪಿ ಮುದ್ದಾಡಬೇಕು ನಿನ್ನ ನಾನು,

ನನ್ನ ತೋಳ್ತೆಕ್ಕೆಯಲ್ಲಿ ಬಂಧಿಯಾಗುವೆಯಾ ನೀನು.

- ಹರ್ಷ ಹೆಮ್ಮಾಡಿ.

ಮರೆತಂತೆ ನಟಿಸು

ಮರೆತಂತೆ ನಟಿಸು ಓ ಚಿನ್ನ,

ಹಾಗಂತ ಮರೆತೇ ಬಿಡಬೇಡ ನನ್ನ.

ಬರಬರುತ್ತಾ ತುಂಬಾ ಹಚ್ಚಿಕೊಳ್ಳುತ್ತಿದ್ದೇನೆ,

ನಿನ್ನಲ್ಲಿ ನನ್ನೇ ನಾ ಕಳೆದುಕೊಳ್ಳುತ್ತಿದ್ದೇನೆ.

ಗೊತ್ತಿಲ್ಲ ನಗಬೇಕೋ ನೀ ಇರುವೆಯೆಂದು.

ಇಲ್ಲ ಅಳಬೇಕೋ ನೀ ನನ್ನವಳಾಗುವುದಿಲ್ಲವೆಂದು,

ಪ್ರೀತಿಸು ಅದರೂ ನನ್ನ ದೂರವಿರಿಸು.

ನನಗೆ ತಿಳಿಯದಂತೆ ನನ್ನ ಪ್ರೀತಿಸು.

- ಹರ್ಷ ಹೆಮ್ಮಾಡಿ.

ಅವನು ಅವಳು

ಅವನು ಅವಳೊಳಗೆ ಅವಳು ಅವನೊಳಗೆ,

ಪ್ರೀತಿ ಮೂಡಿತ್ತು ಅವರಿಬ್ಬರೊಳಗೆ. 

ಬಯಸದೇ ಒಬ್ಬರಿಗೊಬ್ಬರು ಪರಿಚಯವಾದರು,

ಬಯಸಿ ಬಯಸಿ ಒಬ್ಬರನ್ನೊಬ್ಬರು ಪ್ರೀತಿಸಿದರು.

ಎಂದೂ ಕಾಣದ ಖುಷಿ ಅವರಿಬ್ಬರೊಳಗೆ ಮೂಡಿತ್ತು,

ನಲಿವೆಂಬ ಬೂದಿಯೊಳಗೆ ನೋವೆಂಬ ಕೆಂಡವಿತ್ತು.

ಹರೆಯದಲ್ಲಿ ಕಾಣುತ್ತಿದ್ದ ಕನಸು ಪ್ರೀತಿ ಮೂಡಿಸಿತು,

ಭವಿಷ್ಯದ ಬಗ್ಗೆ ಚಿಂತಿಸುತ್ತಿದ್ದ ಮನಸು ಪ್ರೀತಿ ಮುರಿಯಿತು.

- ಹರ್ಷ ಹೆಮ್ಮಾಡಿ.

ಹರ್ಷ ಉವಾಚ - ೯

“ಪ್ರಯತ್ನ ಫಲಿಸಲು ಅದೃಷ್ಟ ಎಷ್ಟು ಅಗತ್ಯವೋ, ಅದೃಷ್ಟ ಖುಲಾಯಿಸಲೂ ಕೂಡ ಪ್ರಯತ್ನ ಅಷ್ಟೇ ಅಗತ್ಯ.”

- ಹರ್ಷ ಹೆಮ್ಮಾಡಿ.

ಪರಿಪೂರ್ಣ

ಯಾರು ಪರಿಪೂರ್ಣ ಹೇಳಿ ಈ ಜಗದೊಳಗೆ,

ಮೇಲೆ ತಳುಕು ಬಳುಕು ಬರೀ ಹುಳುಕು ಒಳಗೊಳಗೆ.

ಮೂರುದಿನದ ಬಾಳಿಗೆ ಇಲ್ಲಸಲ್ಲದ ತಕರಾರು,

ಪ್ರತಿಯೊಂದು ಹೆಜ್ಜೆಗೂ ನೂರಾರು ಕರಾರು.

ಯಾಕೆ ಮರುಗುವುದು ಮಾಡಿ ನಿನ್ನೆ ನಾಳೆಯ ಚಿಂತೆ,

ಇಂದು ಖುಷಿಯಾಗಿರು ನಿನ್ನೆ ನಾಳೆ ಕೇವಲ ಅಂತೆ ಕಂತೆ.

ಯಾರನ್ನೋ ಮೆಚ್ಚಿಸಲು ನಾವ್ಯಾಕೆ ಒದ್ದಾಡಬೇಕು,

ಬದುಕಲು ನಮ್ಮ ಮೇಲೆ ನಮಗೆ ಗೌರವವಿದ್ದರೆ ಸಾಕು.

- ಹರ್ಷ ಹೆಮ್ಮಾಡಿ.

ಒರಟು

ನಾ ಬೇಲಿಮೇಲಿನ ಮುಳ್ಳು ತುಂಬಾ ಒರಟು,

ನೀ ಮೃದುವಾದ ಎಲೆ ದೂರನಿಂತೇ ಹರಟು.

ನಾನೇ ನಿನಗೆ ನೀನೇ ನನಗೆ ತಾಗಿದರೂ,

ತೊಂದರೆ ನಿನಗೆ ಎಷ್ಟು ಜಾಗ್ರತೆವಹಿಸಿದರು.

ಇದಮರೆತು ಹತ್ತಿರಬಂದರೆ ಜೋಕೆ,

ಆಮೇಲೆ ನೀ ನನ್ನ ಬಯ್ಯುವುದು ಬೇಕೆ.

ಆದರೂ ನಿನಗಿಷ್ಟವಿದ್ದರೆ ನಾ ಬಯಸುವೆ ನಿನ್ನ ಸ್ಪರ್ಷ,

ಸ್ಪರ್ಷವಾದಮೇಲೂ ನಿನ್ನಲ್ಲಿರುವುದಾದರೆ ಮಾತ್ರ ಹರ್ಷ.

- ಹರ್ಷ ಹೆಮ್ಮಾಡಿ.  

ಚಂಚಲೆ

ಚಂಚಲೆ ಇವಳು ಏನೇನೋ ಬಯಸುತ್ತಾಳೆ,

ಬಾಯಿಬಿಡದೇ ಪರೋಕ್ಷವಾಗಿ ನೋಯಿಸುತ್ತಾಳೆ.

ನಿನ್ನ ಬಾಳಲ್ಲಿ ಖುಷಿಯನ್ನು ಹೊತ್ತುತರುತ್ತೇನಂದವಳು,

ಕೇವಲ ನಾ ಬರೆವ ಹಾಳೆಗೂ ಲೇಖನಿ ಮಸಿಗೂ ಸೀಮಿತವಾದಳು. 

ತುಸುಗಳಿಗೆ ಬೆಟ್ಟದಷ್ಟು ಪ್ರೀತಿಸುತ್ತಿದ್ದಳು,

ಅದಬಿಟ್ಟರೇ ಬೆಟ್ಟವೇ ತಲೆಮೇಲೆ ಬಿದ್ದಂತಾಡುತ್ತಿದ್ದಳು.

ಪ್ರೀತಿಮಾಡಲು ತಾಳ್ಮೆ ತುಂಬಾ ಅಗತ್ಯ,

ನನಗದು ಸ್ವಲ್ಪ ಕಡಿಮೆ ಅರ್ಥವಾಯಿತೀಗ ಆ ಸತ್ಯ.

- ಹರ್ಷ ಹೆಮ್ಮಾಡಿ.

ಬಿದ್ದೆ

ನನ್ನಷ್ಟಕ್ಕೆ ನಾ ಹೇಗೋ ಇದ್ದೆ,

ನೀ ಬಂದು ಕದ್ದೆ ನನ್ನ ನಿದ್ದೆ.

ನಾ ಎದ್ದೆ ನಿನ್ನ ಹಿಂದೆ ಬಿದ್ದೆ,

ಮುದ್ದು ಮಾಡಿ ನೀ ನನ್ನ ಗೆದ್ದೆ.

ಅಂದಿದ್ದೇ ನೀ ನನ್ನ ಬಾಳಿಗೆ ಬದ್ಧೆ,

ಆದರಿಂದೇಕೋ ಕೇಳಿಸ್ತಿಲ್ಲ ನಿನ್ನ ಸದ್ದೆ.

ಏನಾಯ್ತೀಗ ಯಾಕೆ ಹೀಗೆ ಒದ್ದೆ,

ಎಷ್ಟು ಒರೆಸಿದರೂ ಕಣ್ಣನಿಸುತ್ತಿದೆ ಒದ್ದೆ.

- ಹರ್ಷ ಹೆಮ್ಮಾಡಿ.

ಪದಾಧಿಕಾರಿ

ನಿನ್ನ ಬಿಗಿಯಪ್ಪುಗೆಯಲ್ಲಿ ಜಗವ ಮರೆಯುವಾಸೆ,

ತಡಮಾಡದೆ ಬಂದೆನ್ನ ಅಪ್ಪು ನನ್ನಮ್ಮನ ಸೊಸೆ.

ಪ್ರತೀಕ್ಷಣ ಇರಬೇಕು ನೀ ನನ್ನ ಸನಿಹ,

ಈ ಬದುಕೇ ಅಪೂರ್ಣ ಕಣೆ ನಿನ್ನ ವಿನಹ.

ನಿನ್ನ ತೊಡೆಮೇಲೆ ತಲೆಯಿಟ್ಟು ಮಲಗಬೇಕು,

ಬಿಡುವಿದ್ದರೆ ಅರೆಗಳಿಗೆ ನನ್ನ ತಲೆಸವರಿದರೆ ಸಾಕು.

ನನ್ನ ಬಹುತೇಕ ಕವನಗಳಿಗೆ ಪದಗಳೇ ನೀನು,

ನಿನ್ನ ಬಾಳಿಗೆ ಪದಾಧಿಕಾರಿಯಾಗಲೇ ನಾನು.

- ಹರ್ಷ ಹೆಮ್ಮಾಡಿ.

ಕ್ಷಮೆ

ನನ್ನವಳ ಮುನಿಸಿನ ಕೋಟೆಯೊಳಗೂ ನನ್ನ ಮೇಲೆ ಪ್ರೀತಿಯಿತ್ತು,

ಕೋಟೆಯೊಳಹೊಕ್ಕರೆ ರಾಶಿ ರಾಶಿ ಮುತ್ತಿನ ಮೂಟೆಯಿತ್ತು.

ಕೆಲವುದಿನಗಳಿಂದ ಒಬ್ಬರಿಗೊಬ್ಬರು ಹೇಳಿಕೊಳ್ಳುತ್ತಿದ್ದೆವು ನೀ ದೂರ ಹೋಗು,

ನಿಜ ಹೇಳಬೇಕೆಂದರೆ ಇಬ್ಬರಿಗೂ ನಿದ್ದೆ ಬರಲ್ಲ ಆಗದೇ ಕರೆಸಂದೇಶಗಳ ಕೂಗು.

ಇಬ್ಬರಿಗೂ ಸ್ವಾಭಿಮಾನ ಯಾವುದೋ ಒಂದು ಸಣ್ಣ ವಿಷಯಕ್ಕೆ ಮನಸ್ತಾಪ,

ಸ್ವಾಭಿಮಾನ ದುರಾಭಿಮಾನವಾಗದಿರಲೆಂದು ನಾನೇ ಮಾಡಿದೆ ಕ್ಷಮೆಯ ಪ್ರಸ್ತಾಪ.

ಮನಸ್ಫೂರ್ತಿಯಾಗಿ ಅವಳಿಗೋಸ್ಕರ ಸೋಲುವುದರಲ್ಲೂ ಒಂದು ಖುಷಿಯಿತ್ತು,

ಕ್ಷಮಿಸೆಂದ ಮರುಕ್ಷಣವೇ ನನ್ನ ಪ್ರೀತಿ ಬಂದು ಗಟ್ಟಿಯಾಗಿ ನನ್ನ ತಬ್ಬಿತ್ತು.

-ಹರ್ಷ ಹೆಮ್ಮಾಡಿ.

ಶಿಕ್ಷೆ

ನಿನ್ನ ಹೃದಯವೇ ನನ್ನಿಂದ ಘಾಸಿಯಾದಮೇಲೆ ಹೇಳಲೇನುಳಿದಿದೆ ಗೆಳತಿ,

ಯಾವ ನಿಯಮದಡಿ ಶಿಕ್ಷೆ ಕೊಟ್ಟರೂ ಈ ಪಾಪಕ್ಕಿಲ್ಲ ಮುಕುತಿ.

ಮುಂಗೋಪಿ ನಾ ಮನಬಂದಂತೆ ನಿನ್ನ ಬೈದೆ,

ನೀ ಮರುಮಾತನಾಡದೆ ಬರೀ ಮೌನದಲ್ಲೇ ನನ್ನ ಕೊಂದೆ.

ಅಪೇಕ್ಷಿಸದೇ ಬಂದೆ ನೀ ನನ್ನ ಬಾಳಲ್ಲಿ,

ಇಷ್ಟವಾದಮೇಲೆ ಸಿಗದೇ ಹೋದೆ ನೀ ನನ್ನ ತೋಳಲ್ಲಿ.

ಇಂದು ನಿನ್ನ ಮೃದು ಮಧುರ ಮಾತುಗಳು ಬರೀ ನೆನಪು ಮಾತ್ರ,

ತಿಳಿಯುತ್ತಿಲ್ಲ ಗೆಳತಿ ಹೇಳಲೀ ನನ್ನೀ ನೋವುಗಳನ್ನು ಯಾರ ಹತ್ತಿರ.

-ಹರ್ಷ ಹೆಮ್ಮಾಡಿ.

ಸಿಟ್ಟು

ಸೋಲು ಗೆಲುವು ಹಂಚಿಕೊಳ್ಳುತ್ತೇನೆಂದು ಬಂದವಳು,

ನನ್ನ ಸಿಟ್ಟಿಗೆ ಸೋತು ಅಂಚೆ ವಿಳಾಸವೂ ಹೇಳದೇ ಹೊರಟಳು.

ಸಂತೆ ಮುಗಿದಮೇಲೆ ಖಾಲಿ ಬೀದಿಯಲ್ಲಿ ಒಬ್ಬನೇ ಕುಳಿತಂತೆ ಭಾಸ,

ಅಲ್ಲಿ ಉಳಿದಿರುವ ಪ್ರಾಣಿಪಕ್ಷಿಗಳೇ ನನಗೀಗ ಆದಂತೆ ಖಾಸ.

ಊರೇ ಮುಳುಗಿದರೂ ನಾ ಬದಲಿಸೋಲ್ಲ ನನ್ನ ಸ್ವಭಾವ,

ನನಗೆಂದೂ ಕಾಡುವುದಿಲ್ಲ ಆತ್ಮಸ್ಥೈರ್ಯದ ಅಭಾವ.

ನಾನಾಡಬೇಕಾದ ಮಾತಿನ್ನು ಒಂದೂ ಉಳಿದಿಲ್ಲ,

ಬರದೇ ಇರು ಮತ್ತೊಮ್ಮೆ ಆ ಪ್ರೀತಿಯೂ ನಿನಗಿನ್ನು ಸಿಗುವುದಿಲ್ಲ.

- ಹರ್ಷ ಹೆಮ್ಮಾಡಿ.

ಗೆಳೆಯ

ಬಹಳ ದಿನಗಳ ನಂತರ ಬಂದ ನನ್ನ ಗೆಳೆಯ,

ತೊಳೆದು ಹೋದ ಮನಸ್ಸಿನಲ್ಲಿದ್ದ ಬೇಜಾರಿನ ಕೊಳೆಯ.

ಯಾರನ್ನೂ ಅತೀ ಹತ್ತಿರಕ್ಕೆ ಸೇರಿಸದ ಈ ಹರ್ಷ,

ಗೊತ್ತಾಗಲೇ ಇಲ್ಲ ನಿನ್ನೊಂದಿಗೆ ಕಳೆದದ್ದು ಒಂದು ವರ್ಷ.

ಮೊದಮೊದಲು ಸ್ವಲ್ಪ ಕಿತ್ತಾಡುತ್ತಿದ್ದೆವು ನಾವು,

ಬರಬರುತ್ತಾ ಕಿತ್ತಾಟ ನಿಂತು ಹೆಚ್ಚಾಯ್ತು ಸ್ನೇಹದ ಕಾವು.

ಎಲ್ಲೋ ಒಂದುಕಡೆ ನೋವಾಗುತ್ತಿದೆ ನಿನ್ನ ಅಗಲುವಿಕೆ,

ಮುಂದೆಂದಾಗುವುದೆಂದು ಕಾಯುತ್ತಿದ್ದೇನೆ ನಿನ್ನ ಬರುವಿಕೆ.

-ಹರ್ಷ ಹೆಮ್ಮಾಡಿ.

ಮರಳಿ ಬಾ ಪ್ರೀತಿ

ಬಾ ಪ್ರೀತಿ ಮರಳಿ ಮನದಂಗಳಕೆ ನನ್ನೆಲ್ಲಾ ತಪ್ಪುಗಳನ್ನು ಮಾಡಿ ಮಾನ್ಯ,

ನೀನಿಲ್ಲದ ಈ ಬದುಕಿಗೆ ಅರ್ಥವೇ ಇಲ್ಲ ಇದು ಬರೀ ಶೂನ್ಯ.

ಮನದ ಸುತ್ತಲೂ ತುಂಬಿಹುದು ಬರೀ ಕಪ್ಪುಗಟ್ಟಿದ ಕತ್ತಲು,

ಮೆತ್ತಲು ನಿನ್ನ ಪ್ರೀತಿ ಹೊದಿಕೆಯಿಲ್ಲದೆ ನನ್ನ ಹೃದಯವಾಗಿದೆ ಬೆತ್ತಲು.

ಕಾಡಬೇಡ ನೀ ಚೆಲುವೆ ನನ್ನ ಪ್ರತಿಕ್ಷಣ ಪ್ರತಿದಿನ,

ನೋಡಬೇಕಾದರೆ ಬೇಗ ಬಾ ನಾ ಬದುಕಿರುವುದಿನ್ನು ಮೂರೇ ದಿನ.

ಬೆಂಕಿ ನೀ ಬಂದರೆ ಬೆಣ್ಣೆಯಂತೆ ಕರಗುವನು ಈ ಹರ್ಷ,

ಬಾ ಪ್ರೀತಿ ಮತ್ತೊಮ್ಮೆ ಮಾಡಿಸು ನನಗೆ ನಿನ್ನ ಸ್ಪರ್ಷ. 

-ಹರ್ಷ ಹೆಮ್ಮಾಡಿ.